食完飯, 係屋企換埋婚紗, 十二點半就出發去伊甸園喇! 咁早過去係因為約咗阿May係o個度轉妝, 佢好準時到, 仲即刻去霸房tim! 大約半個鐘就攪點, 好鍾意呢個造型, 因為用咗好多鮮花, 又配搭得好好呢!
右下角張相, 原來攝影師將我哋對婚戒放咗係花球上, 之後收相先知呀!
轉好妝, 係時候出去登記報到喇! 我哋係度聽工作人員講解, 而我哋揀咗最簡短o既誓詞, 快啲講完好啲! 之後簽埋名就登記完畢了! 期間見好多朋友到咗, 仲同佢哋打招呼呢!
坐係度都要影吓相, 仲有我的Kitty介指枕呀!
親戚朋友及blog友紛紛入場, 而我哋就企係出面ready進場喇! 好緊張呀!
當工作人員一開門, 我哋就進場了! 見到好多對眼睛望住自己, 拍住手歡迎我哋, o個刻仲緊張, 雖然短短o既路, 都覺得行咗好耐!
我哋行埋去就坐, 之後監禮人請我哋起身, 講咗一大段說話, 當時我已經緊張到成身震, 都唔記得佢講過咩 lur!
跟住雙方交換戒指, 好多攝影機閃呀閃呀! 每個step都要停下來俾佢哋影.
到宣讀誓詞, 都唔知自己讀得夠唔夠大聲, 只係知道我都好小心慢慢讀, 而小馬讀o個刻, 我好細心咁聽, 更不時望佢呢!
揭頭紗喇! 可以睇清楚啲野, 隔住層紗真係模查查呢! 呢刻梗係唔少得要咀咀啦!
之後到簽結婚證書, 因為我有啲手震, 所以簽得唔係咁靚呀! 反而小馬好用心去簽.
雙方証婚人簽名, 跟住到監禮人係上面蓋印簽名, 仲幫我哋將張證書放入證書套內, 咁就禮成喇! 呢位姓丁監禮人唔錯, 成日笑笑口!
Yeah! 我哋已經成為合法夫妻喇! 最後又要係眾人面前再咀咀, 有Grace o既安排, 我哋受到在場各位o既祝福, 好開心呢! 由於時間有限, 所以係裡面只係同屋企人影相, 其他親戚朋友就留待係出面喇!
夠鐘要離場喇! 大家狹道歡送我哋, o個刻成個人鬆哂 lur! 真係衷心多謝各位親屬朋友blog友到來見證呢刻呢!
由於我覺得好凍, 於是即刻著番件毛毛被肩先落得樓下, 之後我哋由Grace帶領下, 行去另一度影相, 當然唔少得o黎張大合照啦! 之後我哋又行過去香港公園影.
呢part好攪笑! Grace叫我哋玩吓, 要我哋身邊啲人扮路人甲, 但又要好似model咁行得靚靚, 而我同小馬就要扮好開心係度傾計, 當唔識側邊o既人, 個個玩得不知幾開心呢!
一直向正門行去, 沿途遇到一班學生, 話做緊功課, 要同我哋影張相, 好啦! 就影一張啦! 點知準備走時, 又有一班學生走埋o黎話要影, 我哋又影咗, 跟住見對面仲有好多學生向我哋方向跑過o黎, 我哋見勢色不對, 於是急急腳向住泊花車o個面走, 好彩無再跟過o黎咋!
我哋係呢度又影吓相, 其實我哋想快啲離開呢度, 因為我心急趕住去中環影外影呢! 係香港公園都逗留咗一個鐘, 大約係三點半就出發去中環喇!
Copyright © 2013 Yahoo! Hong Kong Limited. 版權
david