24/11 ~ 今日約咗早上去東區醫院見醫生, 順便可以問埋Oscar o既結果, 去到先登記, 入房量血壓,磅重同驗小便, 之後係出面等叫名, 我哋坐係度睇吓教餵人奶o既錄影帶, 今次等咗唔係好耐就入得房見醫生喇!
入到去見到係女醫生, 姑娘叫我坐上床驗陰道, 我其實唔想驗, 問醫生我之前係私家做body check 時做過柏氏抺片無問題, 可唔可以唔做, 但醫生話咁你係政府無做過無紀錄, 所以要做, 因為擔心驗陰道會影響阿b, 佢話無問題的, 係無辦法o既情況下, 唯有照做啦! 跟住醫生用部機check阿b心跳, 聽到心跳聲呀!
驗哂之後, 醫生講番第一次驗血報告無問題, 我問Oscar呢? 佢都話無問題, 咁我就鬆一口氣了! 之後話安排我做結構, 都好喎! 雖然我都book咗私家做, 始終我覺得私家係詳細啲o既~ 我又同醫生講我隻左腳腳眼位置腫咗, 行路好痛, 佢話依家攪唔到, 只可以俾止痛藥我食, 唔會俾藥膏你搽, 如果之後仲係咁, 就要做物理治療, 其實事緣我隻腳已經腫咗兩個星期喇! 私家醫生都睇咗兩次, 兩個都話我大肚, 可能係荷爾蒙影響, 依家無野可做到, 唯有等佢自己好番, 都係俾咗止痛藥我咋! 咁無辦法啦~ 個個醫生都係咁講, 希望隻腳會慢慢好番啦! 真係唔想痛到生呀....
沒有留言:
張貼留言