15/10 ~ 自從上兩星期見完啡後, 就無再見小小馬了! 好掛住佢呢! 今日o黎見醫生, 真係等得好心急呀! 仲有今日係我生日, 可以係生日見到小小馬特別開心o架! 約咗下午一點, 循例每次都要驗尿蛋白, 量血壓同磅重, 發覺自己原來無重過, 可能之前都無咩胃口食野, 所以未有增磅....
入到房, 盧醫生問我仲有無見啡, 我話 keep住食安胎藥, 又多咗休息, 好好多了! 跟住去照U/S先, 依家唔駛谷滿個膀胱都可以照到喇~ 我見到小小馬呀! 佢已經唔係一粒豆了, 醫生話我知呢個係頭, 呢個係身, 呢個係心, 不過仲未清楚見到手腳, 只見到小小馬係子宮裡面浮吓浮吓, 醫生又開心跳聲俾我哋聽, 有186bpm, 好有節奏呢! 同埋今次小小馬好叻呀! 個size係2.12cm, 追番近個週數, 未照之前真係擔心佢細呢! 醫生總括小小馬一切正常, 睇o黎都隱定了, 所以佢今次唔會再開安胎藥俾我, 只係開咗葉酸, 另外又開咗鈣丸及維他命, 醫生話到三個月時就可以轉食呢啲, 唔需要再食葉酸o架喇~ 醫生講好多媽媽都可以食Materna, 但因為我依家去大大去得好辛苦, 如果食埋就梗加去唔到, 所以醫生唔建議我食Materna, 只可食佢開o既丸.
我問咗醫生可否幫我留位, 因為都驚仁安五月o既床位會full, 佢話可以, 不過下次覆診時就要交埋按金喇! 同埋同咗醫生講我係東區約咗做Oscar, 有無需要再係私家做多次, 佢話其實照Oscar時, 度頸皮好睇個醫生手勢, 不過唔會相差好遠, 而驗血o個part, 政府同私家都係拎去QE或者中大都驗, 所以係無分別, 如果唔放心可以去私家做多次, 不過盧醫生就話其實係東區做已經ok, 咁我就可以慳番千幾二千蚊了! 就因為我係政府照Oscar, 都會照U/S見到阿b, 所以醫生話唔駛咁密o黎, 約我係十二月中先再o黎產檢.
今年生日因為陀住小小馬, 所以無出外旅行, 連正日都無周圍去, 只留係屋企休息, 加上胃口不佳, 所以都無諗過去邊度慶祝. 雖然係平淡咁渡過生日, 但已經好開心滿足, 因為有小小馬陪我過生日, 我o既願望只係希望小小馬健康成長, 同埋想快啲見到佢出世呀!
夜晚去咗呢間意大利餐廳
柯打咗個二人餐
其實我食得唔多, 因為真係無胃口呢!
今年o既生日禮物係老公送 o既Olympus相機, 係我鍾意o既白色, 同埋最珍貴o既禮物就係小小馬, 呢份用錢都買唔到, 老公 ~ 多謝你!!!
佢得港安同浸會掛單呀,所要只好選擇港安啦!
其實,我覺得仁安環境服務都比較好呀!最衰無相熟醫生呀!
你老公對你真好
因為部相機都幾貴呢