到差唔多九點, 我哋就摸黑行出o黎, 係門口坐低等進場, Bonny & Tony就開始介紹, 同埋播成長片段, 一路播我就好緊張呢! 仲聽到啲人嘩嘩聲! 阿May都陪埋我出o黎, 幫我整理件婚紗, 佢同客務主任又教我點進場, 叫我唔好咁緊張, 話一陣唔好行咁急, 望住前面, 沿路會有兄弟姊妹拋花瓣同放炮o架!
播完片段後, 我哋就進場喇! 前面放煙, 當時我都唔係睇得好清楚前面, 只係係咁向前行, 到中間就轉右, 見啲賓客一路拍手一路歡迎我哋, 小馬就好輕鬆, 同賓客揮手, 我就緊張到只係識得笑, 想快啲到台上呀!
上到台, 先切假蛋糕, 跟住合緊交杯, 我又飲哂成杯cream soda 呢!
徇眾要求, 梗係要咀咀啦! 一路咀一路落雪, 加埋城堡backdrop, 好浪漫呀! 之後我哋致謝辭, 我哋所講都係臨場發揮, 無夾定o架! 小馬講o既時候, 除了多謝佢媽咪同我父母, 最重要多謝我係呢年幾, 咁用心籌備我哋o既婚禮先可以咁完滿, 而我專登抿住咀, 忍住唔喊出o黎呢! 到我講o既時候, 都多謝小馬呢段時間, 咁包容我, 我先可以攪到個婚禮咁滿意, 另外好彩記得多謝埋一班兄弟姊妹呀!
最後, 梗係要舉杯同各位來賓飲杯啦!
我哋落台, 去番主家席就座, 大家飲杯! 可以食野喇! 我都食咗少少野, 而小馬就食唔停!
呢個環節係多謝父母, 於是係食野時段, 先播放我事前搵AG整o既video, 主要係我哋細個o既相, (包括同父母影的), 加上一篇多謝辭及"真的愛你"一曲, 當時真係令在場來賓都感染到, 忍唔住哼起歌來呢!
奶奶同媽咪每人送了一束花, 款式係抄Agnes b o架! 哈哈! 而阿爸就送了兩支軒尼詩, 本來唔係送呢兩支o架! 原本是送支XO, 但因為酒樓o既疏忽, 攪到支XO俾人開咗o黎飲, 開支貴野都要問我哋先啦! 到開席先知, 激死我同小馬呀! 經理同我哋解釋, 係個waiter疏忽, 連忙道歉, 呢件事錢小姐都知, 到散席經理送番支馬爹利當補償喎! 彌補都無用啦! 所以o個時唯有用軒尼詩頂當啦! 之後都無話番呢件事俾阿爸知, 費時佢唔開心啦!
當時阿爸不知幾開心, 幾high! 仲落台攞杯酒同大家飲杯tim!
我哋事先派咗啲心型咭同筆紙係每張檯上, 目的係想每個賓客可以寫低一啲祝福語俾我哋留為紀念, 我哋仲安排咗Bonny & Tony係台上叫大家寫, 因為到時佢哋會去每檯收集呢啲心意咭, 稍後會用o黎玩抽獎遊戲o架!
酒樓咁架，無啦啦開人支酒都唔問句。
我之前都有諗過叫賓客寫心意咭for抽奬，但d兄弟又話賓客唔會寫，同埋諗唔到點抽，佢地又怕麻煩，所以取消左。
是哪間公司呀??
好靚^^
貴唔貴呀??
真係百看不厭呀^^