第六天 (15 Oct 2009)
築地 => 淺草 => 新宿
今日係我生日呀! 特登安排今日到築地食我最鍾意o既野 ~ 壽司, 雖然明知要排隊好耐, 但可以食到咁新鮮o既壽司都值得啦!
我哋早上七點就起行喇! 搭都營大江戶線可直達築地市場, 車程大約20分鐘
小馬依家個樣尚算精神, hehe! 晏啲就唔知喇!
到了築地市場駅
係車站內, 已經見到好多遊客向市場方向行, 我哋先去場內市埸, 因為要早啲去壽司大排隊, 驚晏啲仲多人呀!
由於呢度有好多魚獲批發店及食店, 好多魚販每朝都要駕駛運魚車係築地市場採購同搬運貨物
我哋行路都要小心搬運車呀!
行到伊藤, 即對面就係壽司大喇! 呢間店出名賣長靴
仲有魚文字 tee, 睇過裡面都有 Hello Kitty 築地限定品賣
我哋到了壽司大了!
睇落唔係好多人, 大多數都係遊客, 但係我哋都排咗好耐呀!
條路都幾窄, 有時仲會有手推車或搬運車經過
壽司大隔兩個舖位就係大和壽司, 呢間平時都排長龍, 不過唔知點解, 今日就無咩人喎!
排到咁上下, 有個女士走出o黎問我哋幾多位, 同埋會order 邊set套餐, 我哋第一次o黎, 唔知有套餐, 佢話只有兩set, 一款係Yen3900, 有11件壽司, 同埋包唔知咩野, 因為聽唔明, 另一set就少啲壽司, 咁我哋更係揀最多件o個款套餐啦! 每人要一set Yen3900 套餐!
見唔見到小馬呀! 就快到我哋有位喇!
等咗差唔多個半鐘, 可接受, 因為有時係香港等板前都要咁o既時間, 更何況呢度o既 quality 正咁多!
好多壽司名, 但睇唔明!
店內都幾迫, 大約可容納12人, 有兩位師傅serve客人
呢位師傅serve我哋, 佢好nice好風趣, 成日用唔鹹唔淡o既廣東話同我哋講野, 真係笑死人呢!
佢會逐件壽司送上檯, 等你食完先再上, 仲會話你知邊啲壽司唔駛沾豉油食, 話咁食先食得出鮮味喎! 真係 pro呀!
我哋開餐喇! 第一件就送上超正o既Toro壽司
蛋卷 ~ 送上o黎時熱辣辣, 甜甜地好好味喎!
鱸魚 ~ 入口已感覺到鮮甜o既魚味充斥著我成個口腔內, 正!
味噌湯 ~ 非一般o既湯, 內有新鮮魚肉, 令到個湯好鮮好甜呀!
金目綢 ~ 有幾新鮮, 睇見表面令立立就知啦! 而且好味道到難以形容喇!
海膽壽司 ~ 我o既至愛呀! 完全無腥味, 好鮮甜, 好想再食多件呀!
吞拿魚壽司 ~ 平時我唔會食, 但呢件壽司真係令我對佢改觀了, 咁當然香港o個啲更係無得比啦!
北寄貝 ~ 送上o黎時仲郁o架! 好新鮮呢!
池魚 ~ 一啲都唔腥, 而且師傳話唔駛沾豉油食, 更鮮甜!
海蝦壽司 ~ 只可以用一個字o黎形容: 正呀!
鐵火卷 ~ 普通卷物都好味過人, 入面啲材料食得出都好新鮮
三文魚籽壽司 ~ 粒粒魚籽都咁大粒, 我平時唔食o架! 不過o黎到更係要試啦!
海鰻壽司 ~ 鰻魚又軟又暖, 加上鰻魚汁食, 好好味, 即刻係口內融化了, 口感好正!
最後師傅話可以係menu內自選一件, 我哋揀咗鮑魚壽司, 不過新鮮o既鮑魚真係好硬呀!
師傅好專心係度整壽司, 多謝你帶俾我哋一頓咁豐富咁美味咁難忘o既早餐呀!
壽司大 ~ 必食推介!!!
今餐我哋係度真係食得好開心, 覺得物有所值, 相信我哋返到香港都食唔番咁正o既壽司, 希望不久將來會再o黎食過啦!
食飽後, 我哋要周圍行吓喇! 就由場內市場開始啦!
. . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . .
. . . . . . . . . . . . . . . . . . . . . . . . . . . . . . . . . . . . . . . . . . . . . . . . . .
快d 寫埋la 我剛開始做功課..... heehee