係東京返o黎都差唔多大半個月了, hehe!!! 到依家依然好掛住個邊o既野, 好想好快再去日本呢!
講起呢次旅程, 過程都好順利, 起初以為日本自由行會好困難, 但去到都好順利搵到想去o既地方, 可能我預先早定功課啦! 所以睇住自己啲note就容易好多喇! 我哋係八日裡去咗好多地方, 行咗好多路, 食咗好多野, 影咗好多相, 仲買咗好多野 tim! 今次仲要多謝我老公呀! 今年可以係日本渡過一個難忙愉快的生日呢!
好想同大家分享我哋八日o既遊記, 同埋希望裡面啲資料可以幫到大家啦 ~
第一天 (10 Nov 09)
出發 => 香港機場 => 新宿 => Sunroute Plaza Hotel => 夜遊歌舞技町
前一晚執行李都攪到好夜, 但第二朝要一早起身, 不過都知醒, 因為有得去玩, 梗係好精神啦! 我哋搭巴士入機場, 去到差唔多九點鐘, 先去 JAL counter check-in, 之後去咗"海皇"食早餐, 本來想去"大家樂", 但原來已經close 了!
食飽後就搭無人駕駛去閘口, 因為要上機喇!
我哋搭 JAL, 起飛時間 10:45
我哋check-in 時, request坐樓上, 好彩未 full, 所以都安排到, 樓上真係闊落好多呢!
起飛喇! 外面好靚呀~
小馬係機上睇片, 我就攞啲行程出o黎溫吓, 搵定搭巴士出新宿o既位置. 過了一陣, 開始食飛機餐喇! 我揀咗茄子豬肉飯
小馬o既牛肉飯
全程要坐四個鐘, 中途瞓吓覺, 而小馬反而好精神咁睇片~
差唔多到了!
望出去已經見到陸地
當地時間下午3:30就抵達成田機場, 準備落機喇!
為咗趕機場巴士, 落機就即刻去過關, 當時無咩人, 總算順利, 跟住去攞行李, 都等咗一陣, 攪點哂就去機場巴士換 ticket, 個CS 好nice, 會問你去邊間酒店, 跟住話俾你知下一班車o既時間, 係 4:15p.m., 仲有10分鐘, 我哋急急腳行去16號巴士站.
巴士 ticket
見到個站喇!
我哋搭 4:15 往新宿, 由於未夠鐘, 要排隊先, 服務員會指示我哋排隊o既位置, 然後交行李俾佢哋, 等車o黎到會安排上車
呢兩張就係取回行李o既票
o黎張自拍先!
全程時間需要100分鐘(官方資料), 但我哋抵達新宿酒店差唔多 18:15, 即用咗兩個鐘, 因為中途塞車呀~ 不過搭巴士真係比搭JR方便好多, 尤其拎大件行李, 唔駛行樓梯上上落落咁辛苦, 雖然價錢就會貴少少, 同埋要預會塞車呀~
巴士會先係新宿京王站停車, 再去Southern Tower Hotel停車, 尾站就係Sunroute Plaza Hotel. 落車時發覺好凍, 原來東京已經轉涼了~ 抵達酒店先去check-in, 跟住趕住上房放低行李就開始我哋o既行程喇 !!!
我哋o既房間呀~ 一早已預咗會好細, 一入房就可以跳上張床呢! 同埋如果打開哂個喼, 條路就行唔到喇~ 不過呢度好企理好新淨.
房間另一邊
浴室
棉花棒係made in Japan, 仲好好用tim!
Shampoo / Conditioner ~ 呢個牌子好似係屬於Shiesido 另一條 line, 小馬試用過後, 話洗完啲頭髮好軟呀~
係房影完一輪, 著番件褸帶埋頸巾要出去喇! 我哋先向歌舞伎町出發醫肚, 由 Lumine 1側面o既入口開始, 打算由地下街行去JR東口, 但行咗好耐都搵唔到, 經過小田急線, 京王線, 都營線, 都搵唔到東口, 係站內搵o黎搵去, 而且人流多, 出入口四通八達, 真係好易迷路呀! 始終新宿係大站, 好多鐵路都會經新宿, 連一向方向感高o既小馬今次都有難道呢~ 不過最後都由係小馬搵到, 佢由地面方向行, 終於搵到JR東口喇!!! 之後o個幾日我哋都嘗試再由其他路行, 試吓可唔可以由地下街行去東口, 但都失敗! 大家如果知道點行, 可否話我知呢? 等我下次去唔駛再由地面行呀!
由東口向歌舞伎町方向行, 過咗馬路會見到百果園, 再直行見到 Matsumoto Kiyoshi藥房, 再過多一條馬路就見到激安之殿堂, 轉左就見到歌舞伎町入口喇!
今晚Dinner 就去咗"博多天神"食拉麵, 呢度淨係有拉麵, 想食餃子都無呢! 同埋裡面裝修好簡單.
每人一碗拉麵, 湯底好正呀! 我哋仲要多個"替玉", 即係柯打多個淨麵
小馬食得好滿足呀!
呢間舖門口有隻豬, 食完可以同佢影相o架!
之後我哋係附近行吓, 又去咗"璣八"買盬燒蝦食, 啲蝦係即叫即燒, 我哋都等咗十分鐘, 因為唔想係街邊企係度食, 所以帶番酒店先嘆佢.
夜晚o既新宿好熱鬧, 五光十色, 四處都有好多金毛男仔, 打扮入時, 向女仔兜搭生意.
沿住原路行番去藥房逛, 好喜歡逛日本o既藥房, 因為多新奇野睇, 而且試用化妝品又無人話, 又唔會有sales 跟住哂咁煩, 不過今晚就唔係買咗好多野.
行完就去"激安之殿堂"逛, 呢度樓高幾層, 有好多野買, 不過入面好逼, 好難係入面逗留得耐, 同埋擺放架上比較雜亂, 我哋行咗兩層就走 lur~ 而價錢都算平o既!
最後我哋係百果園買咗串蜜瓜同哈蜜瓜, 好甜呀! 來好想食士多啤梨o架! 但唔啱季節, 無得買喇! 不過一串都幾貴, 係香港呢個價錢可以買到成個喇!
我哋番酒店喇! 打算由地下街行番酒店, 點知出咗之後, 行錯咗方向, 去咗高島屋o個邊, 於是又行番轉頭, 小馬話行番去 Lumine o個邊, 行上去見到JR南出口喇! 今次啱路喇! 只要一出南口, 直行轉左過馬路, 見麥記再直行, 就見到酒店了! 真係好近呢! 之後我哋識得點行 lur!
我哋經過 ampm便利店, 買咗啲飲品, 甜品同零食就番酒店, 之後每晚都要入o黎行一趟先番酒店呢! haha!!!
呢隻就係盬燒大蝦, 雖然番到o黎已經凍咗, 但啲肉仲好爽好甜, 相信熱食仲正呢!
呢啲就係今晚o既收穫, "休足時間"用o黎敷腳, 行得累可以舒緩吓, 好work o架! Fancel Cleansing Oil 同 Kose Mask 抵過香港, 不過個mask未用過, 今晚就用一張試吓效果, 如果ok先再買啦!
要休息喇! 因為聽日要行好多路呢! 想知去邊, 要留意我哋第二天o既行程喇!
自由行真係唔錯呀，自己鍾意去邊就去邊，不過之前就要做定大把功課，我而家都好似你咁，咁掛住日本呀，哈哈~~
我次次去都入一大堆架..好正嫁, 有微溫..少少WET, 好似見罩咁...
我黎緊又去今次又要入一大堆成LU
我之前去東京跟團，完全無時間行新宿定，下次都一定要自由行。
聽你咁講真係好似唔難搵!
我去親都買...
日頭出動時貼住來行仲正呀~!!!
我好掛住東京ar
今次旅行用既錢多d, 定係北海渡呢?