28/9 ~ 呢晚放工返屋企, 正想開始煮野食, 竟然係 tiolet 又見到啡喇! 仲見到有少少血絲, 當時好驚好擔心, 唔知阿b有無事, 好想即刻入急証, 但老公唔係屋企, 我當時好鎮定咁諗, 不如食粒安胎藥, 瞓床休息睇吓點先, 等聽日先去見醫生啦! 當晚我成日同阿b講, 你唔好嚇媽咪啦! 你要加油呀! 你唔可以有事o架! 好彩當晚夜啲再去 tiolet, 已經無咩事了....
第二日請咗sick leave, 打去仁安診所, 話俾姑娘知因為我流啡, 想約見盧醫生, 但佢上午無哂位喇! 佢幫我打去翹康診所, 睇吓佢下午仲有無位啦! 幾經辛苦, 醫生肯加個位俾我, 不過可能要等耐啲! 唔緊要啦! 最緊要有得睇... 係度要讚吓啲姑娘, 佢哋真係好好人, 態度又好!
老公六點鐘陪我去到翹康登記, 一直等到差唔多八點先見到盧醫生, 一入到去, 講咗個情況俾醫生知, 佢話我仲未陀得隱作小產, 最好休息吓啦! 上次照唔到阿b, 睇吓今次睇唔睇到啦~ 跟住醫生幫我照超聲波, 不過因為飲水唔夠, 個膀胱谷得唔夠, 所以係肚上照唔到, 醫生問我介唔介意用陰超照, 咁照係唔會影響阿b, 當時我不用想就即刻答好, 因為我對醫生有信心, 而且好想知道阿b有無事呢! 醫生放入去就照到喇! 仲見到胎囊tim, 肯定唔係宮外孕, 醫生話阿b仲好細, 不過都度到佢o既size: 0.438cm, 醫生話阿b細咗一星期, 希望下次見醫生時追得番個週數啦~
阿b 好似一粒腰豆呢~
最神奇係已經見到阿b心跳喇! 一閃一閃.... 醫生仲開埋心跳聲俾我哋聽呢!
我同老公都好開心, 照完之後, 個心定咗好多, 仲好實在, 因為之前無咩感覺, 依家我可以好肯定一個小生命已經係我身體內生長緊, 好 amazing 呢!
我問醫生唔知係咪行得太快, 同埋前兩日見無事就停咗安胎藥, 所以又再見啡, 但醫生話唔關事, 因為如果個b本身唔健康, 就算你點留佢都無用, 都係會排斥出來, 所以盡哂自己能力休息多啲就得喇~ 醫生又開咗一星期sick leave俾我, 加埋啲安胎藥, 同埋約我過兩星期再o黎過, 今次我同自己講, 都係keep住食哂啲藥先, 同埋提自己唔好再行得咁快喇!
. . . . . . . . . . . . . . . . . . . . . . . . . . .