8/3 ~ 呢日三八婦女節, 同阿媽及伴娘去睇褂同租佢哋啲衫, 下午我哋先去煌府飲下午茶, 呢次係媽咪第一次上煌府, 佢都好滿意呢度, 因為四四方方同無柱, 但茶市出點心o既速度即有待改善喇! 之後我哋出旺角, 第一站係錦發, serve我哋係郭小姐,
中五幅花柱
大五幅
褂后
小五幅蝴蝶柱
我試完之後, 問咗郭小姐價錢, 佢話呢個係頭褂價, 仲送埋睡衣, 不過我自己覺得只有中五幅花柱係ok, 但我鍾意龍鳳柱, 而錦發呢件, 銀線較多, 伴娘覺得我著得麻麻地, 於是我同媽咪商量, 去埋美華睇咗先決定, 當我哋一出門口, 郭小姐叫番我哋, 話再計平啲, 雖然個價錢真係好吸引, 但我都係想去美華睇睇先!
去到美華, 見到傳聞中o既老細, 佢見到我哋, 叫我哋睇吓啲相先, 因為裡面有人試緊, 咁我哋就係度等喇! 之後鄧太serve我哋, 我試咗中五幅花柱, 八喜, 兩款大五幅同褂后, 嘩! 美華件褂后好閃呀! 不過我一著上身, 伴娘話唔適合我, 有啲紅會好啲!
係試衫期間, 咁啱見到Carrot, 佢又係黎睇褂, 真係好橋呀! 大家同月同日結婚, 又係同一日睇褂, 咁緊係搵佢幫眼睇吓啦! Carrot覺得我著大五幅好睇過中五幅呢! 而佢就要搵埋佢媽咪o黎睇至決定呀!
大五幅龍鳳柱
總括o黎講, 我覺得美華啲褂較新, 我試咁多件都多數好睇, 尤其大五幅, 伴娘同媽咪都一致覺得我著得最好睇, 我鍾意美華o既大五幅係因為個款同錦發有啲唔同, 美華金銀線較平均, 不論睇相或現場睇都較順眼, 於是我哋就決定租美華o既大五幅, 本來想做頭褂, 但價錢貴一倍, 而媽咪話只要件褂新淨, 執得企理俾我, 租都無問題o架! 我都好認同佢哋咁講, 美華啲褂咁新淨, 應該可以好放心呢!
其實套套褂都好似差不多咁,係小五福同大五福或者褂后有d分別,真係唔識分呀!
不過就撞唔到你 lu.. 我試完錦發..
去到美華又係要等, 所以無試就走 lu..
你好快手呀~
我一直諗住去錦發造褂, 但而家睇落美華又唔錯, 真係要去哂2間睇會好d呢。
不過我就係錦發租件小5福